अष्ट्रेलियाको पीआर चाहनुहुन्छ भने यी सेमिनारहरू नछुटाउनुस्

अष्ट्रेलियाको पीआर लिन चाहने विदेशी साथै विदेशी दक्ष कामदार खोजिरहेका अष्ट्रेलियाका व्यवसायीलाई सहयोग गर्न न्यूसाउथवेल्स सरकारले भिसा प्रक्रिया र माईग्रेसन नीतिबारे जानकारी दिन सेमिनारहरूको आयोजना गर्न लागेको छ।

यस्ता सेमिनारहरू न्यूसाउथवेल्सका प्रमुख शहरहरूमा हुने छन् भने यसमा निशुल्क सहभागी हुन सकिन्छ।

अष्ट्रेलियामा बस्दै र पढ्दै आएकाहरू जो अष्ट्रेलियाको स्थायी बसोबास (PR) लिन चाहन्छन्, उनीहरूका लागि खुशीको खबर छ! पीआर लिने प्रक्रियामा सुसूचित गरेर न्यूसाउथवेल्स (NSW) सरकारले नै उनीहरूलाई सहयोग गर्दैछ। 2025 NSW Skilled Migration Seminars मार्फत सरकारले इच्छुक दक्ष आप्रवासीहरू र व्यवसायीहरूलाई उनीहरूकै शहरमा गएर भिसा प्रक्रियाबारे स्पष्ट जानकारी दिनेछ। साथै सहभागीहरूले ईमिग्रेसनका अधिकारी र विज्ञहरुबाट आफ्नो संभावना बारे पनि प्रश्नहरू गर्ने अवसर पाउने छन्। यी सेमिनारहरू विभिन्न शहरहरूमा हुने भएकाले धेरैलाई सहभागी हुन सजिलो पनि हुनेछ।

किन सहभागी हुने?

यस सेमिनारमा तपाईंले NSW सरकारको 'स्टेट नोमिनेसन'को नीति र प्रक्रिया बारे प्रत्यक्ष र प्राथमिक तहको जानकारी पाउनुहुनेछ। अस्ट्रेलियामा स्थायी बसोबास (PR) गर्न मनहुनेहरुको लागि नयाँ अवसर र परिवर्तन भएका नियमहरूको स्पष्ट जानकारी पाइनेछ।

यहाँ विशेषज्ञहरूसँग भेट्ने र छलफल गर्ने अवसर पनि हुनेछ। अस्ट्रेलियाको गृह मामिला विभाग (Department of Home Affairs), स्थानीय सरकारका प्रतिनिधिहरू, र अन्य विज्ञहरूले तपाईँलाई आवश्यक जानकारी दिनेछन्। साथै, Migration Institute of Australia (MIA) का विशेषज्ञहरूले व्यवसायीहरू र आप्रवासीहरूका लागि महत्वपूर्ण सुझावहरू दिनेछन्।

यदि तपाईंलाई राज्य नोमिनेसन (State Nomination) वा दक्ष आप्रवासन (Skilled Migration) बारे जान्न मन छ भने, यो सही अवसर हुनेछ।  

सेमिनार हुने स्थान र मिति

NSW सरकारले यी सेमिनारहरू विभिन्न शहरहरूमा आयोजना गर्दैछ: 

• Wollongong – ४ मार्च, The Builders Club
• Queanbeyan – ५ मार्च, Queanbeyan Performing Arts Centre
• Albury – ६ मार्च, Commercial Club Albury
• Broken Hill – ११ मार्च, Broken Hill Civic Centre
• Dubbo – १२ मार्च, Dubbo RSL
• Orange – १३ मार्च, Department of Primary Industries and Regional Development Orange Office
• Wagga Wagga – १४ मार्च, Charles Sturt University Convention Centre
• Lismore – १८ मार्च, Lismore Workers Sports Club
• Tamworth – १९ मार्च, Tamworth War Memorial Town Hall
• Newcastle – २० मार्च, Fort Scratchley
• Buronga – २४ मार्च, Midway Community Centre
• Parramatta – २५ मार्च, Mantra Hotel
• Webinar – १ अप्रिल (लिङ्क पछि उपलब्ध हुनेछ)

बिहान १०:०० बजे सुरु हुने सेमिनारमा सहभागी हुनको लागी ०९:४५ मा कार्यक्रम स्थलमा पुगिसक्नुपर्नेछ। Buronga मा भने सेमिनार १२:३० बजे सुरु हुनेछ। हरेक स्थानको सेमिनार २.५ घण्टासम्मको हुनेछ। 

कसरी सहभागी हुने?

सेमिनार निःशुल्क छ, तर तपाईंले टिकट बुक गर्नुपर्नेछ। सरकारले सहभागीहरूका लागि खाजाको समेत व्यवस्था गरेको छ। यदि तपाईं अस्ट्रेलियन PR प्रक्रिया बुझ्न चाहनुहुन्छ भने, यो एक सुनौलो अवसर हुन सक्छ। कार्यक्रममा सहभागी हुन यहाँबाट टिकट लिनुहोस। (यहाँ क्लिक गर्नुहोस्)